யாரடி வந்தார் ?

இது நேற்றைய பதிவின் கொக்கிக்கு எழுதப்பட்டது. 
இரண்டு அல்லது மூன்று பகுதிகளாக வெளியாகும். 

மாலினிக்கு அன்று வந்த எஸ் எம் எஸ் : 

" நாளைக் காலை எனக்காக ஒரு அரைமணி நேரம் ஒதுக்க இயலுமா? உங்களை உங்கள் இல்லத்தில் வந்து சந்திக்கிறேன்." 




யாரிடமிருந்து வந்த செய்தி என்ற தகவல் தெரியவில்லை. அறிமுகம் இல்லாத நபர். அவளுடைய மொபைல் போனில் இந்த நம்பர் இல்லை. True caller கொண்டு நம்பரை ஆராய்ந்தால், "Scene 1904" என்று வருகிறது. 

பதில் எஸ் எம் எஸ் செய்தாள்: 

" யார் நீங்கள்? என்ன விஷயமாக சந்திக்க வேண்டும்? இவைகளைக் கூறினால்தான் நான் கமிட் செய்வேன்." 

SMS: 

" மேடம், நான் ஓர் உதவி டைரக்டர். பெயர் மற்றும் விவரங்கள் உங்களை சந்திக்கும்போது கூறுகிறேன். ஒரு குறிப்பிட்ட project சம்பந்தமாக உங்களிடம் ஓர் ஆலோசனை தேவைப்படுகிறது. எந்த நாள், எந்த நேரம் சொல்கிறீர்களோ அதன்படி வந்து பார்க்கிறேன்." 

மாலினி அதற்கு அனுப்பிய செய்தி : " நாள், நேரம் உங்கள் எண்ணுக்கு இன்றைக்குள் அனுப்புகிறேன். நன்றி."

===============

மாலினிக்கு முதலில் தோன்றிய எண்ணம் : ' இவன் யார்? எதற்கு வருகிறான்? யாரேனும்  அண்டப்புளுகன் / ஆகாசப்புளுகன் நிருபர் அல்லது ரசிகன் என்ற பெயரில் ரசிகர் மன்றம் ஆரம்பிக்கின்றேன் - பணம் கொடுங்க என்று கேட்கும் நச்சுப்பிச்சு போலிருக்கு.  உதவி டைரக்டர் என்றானே? பிரபுவுக்குத் தெரிந்த ஆளா இருப்பானோ?'

பிரபுவிற்கு கால் செய்து அவன் என்ன செய்துகொண்டிருக்கிறான் என்று தெரிந்துகொள்வோமா? ச்சே - அதெல்லாம் வேண்டாம். இன்னும் கொஞ்ச நாளைக்கு அவன் காயட்டும். அப்புறம் நிஜமாகவே மனது வருத்தப்படுகிறான், மன்னிப்பு கேட்கிறான் என்று தெரிந்தால் அப்போது பார்த்துக்கொள்வோம். 

'வருபவன் யார் - அவன் என்ன சொல்லப்போகிறான் என்பதெல்லாம் தெரியாமல், இதெல்லாம் என்ன வேண்டாத சிந்தனைகள்' என்று மாலினி தன்னைத் தானே மனதுக்குள் கடிந்துகொண்டாள். 

சரி - மறுநாள் காலை பதினொரு மணிக்கு வரச்சொல்வோம் - அவன் யார், என்ன சொல்கிறான் என்று பார்ப்போம் என்று முடிவெடுத்தாள் மாலினி . செய்தி அனுப்பினாள்.

================

மறுநாள் காலை சரியாக பதினொரு மணிக்கு வாசல் பக்க அழைப்பு மணி ஓசை கேட்டது. 

மாலினியின் புதிய காரியதரிசிப் பெண் போய் வாசல் கதவைத் திறந்தாள். 

(தொடரும்)